Ýurdumyzda howa durnuklylygynyň hukuk esaslaryna bagyşlanan kitap çap edildi

«Ylym» neşirýaty tarapyndan köpçülige hödürlenen täze monografiýa Türkmenistanyň howa syýasatynyň kanunçylyk binýadyny öwrenmäge gönükdirilendir. Ekologiýa hukugy boýunça bilermen, hukuk ylymlarynyň kandidaty Ýolbars Kepbanowyň «Howanyň durnuklylygynyň hukuk esaslary: Türkmenistanda howa hakyndaky kanunçylygyň emele gelşi we ösüşi» atly bu işinde ýurdumyzda howanyň üýtgemegine uýgunlaşmagyň hukuk gurallary ylmy taýdan seljerilýär.

Kitapda halkara-hukuk resminamalarynyň milli kanunçylyk bilen utgaşdyrylyşy, pudagara hyzmatdaşlyk we durnukly ekoulgamy döretmegiň ýollary beýan edilýär. Bu monografiýa döwlet gullukçylary, ekologlar, hukukçylar we talyplar üçin gymmatly gollanma bolar.