Mertlik we ynsanperwerlik mekdebi: “Ýaş halasgärler” bäsleşigi geçirildi

9-njy sentýabrda mukaddes Garaşsyzlygymyzyň 35 ýyllyk baýramy mynasybetli Türkmenistanyň Goranmak ministrliginiň Berdimuhamet Annaýew adyndaky 1-nji ýöriteleşdirilen harby mekdebinde “Ýaş halasgärler” atly bäsleşik geçirildi. Oňa harby mekdebiň okuwçylaryndan düzülen toparlar gatnaşdy.

Bäsleşik Türkmenistanyň Goranmak ministrliginiň Aşgabat şäher raýat goranyşy we halas ediş işleri müdirligi, Türkmenistanyň Gyzyl Ýarymaý Milli Jemgyýeti, Aşgabat şäheriniň Polisiýa müdirliginiň Polisiýanyň ýol gözegçiligi bölümi, “Ýaş tebigatçy” jemgyýetçilik guramasy, Magtymguly adyndaky Ýaşlar guramasynyň Aşgabat şäher Geňeşi tarapyndan bilelikde guraldy.

Ýaş nesillerde mertlik we ynsanperwerlik ýaly ahlak sypatlaryny kemala getirmegi, olaryň raýat goranyşy ham-da adatdan daşary ýagdaýlar boýunça bilimlerini artdyrmagy maksat edinen bäsleşikde harby mekdebiň okuwçylaryndan düzülen toparlar ýedi tapgyr boýunça güýç synanyşdylar. Bäsleşigiň barşynda okuwçylar öz toparlarynyň ady we şygary bilen labyzly tanyşdyrmak, ýol hereketini düzgünleşdirmek, ýangynlary söndürmek we halas ediş işlerini geçirmek, ilkinji kömegi nazary we amaly ýerine ýetirmek, adatdan daşary ýagdaýlar bilen baglanyşykly test ýumuşlaryny çözmek hem-de halas ediş ýüpünde ýakyn aralygy geçmek boýunça öz ukyp-başarnyklaryny görkezdiler.

Çekeleşikli geçen ýaryşyň emin agzalarynyň gelen netijelerine laýyklykda, birinji orny “Watan mertleri” topary eýeledi. Bäsleşigiň ikinji ornuna “Gaýratly ýaşlar”, üçünji ornuna bolsa “Kuwwatly ýaşlar” toparlary mynasyp boldular. Bäsleşigiň ýeňijilerine we oňa gatnaşan toparlaryň ählisine guramaçylar tarapyndan Hormat hatlary hem-da ýadygärlik sowgatlar dabaraly ýagdaýda gowşuryldy.