Astanada sebitiň ekofilm festiwaly geçiriler: Sargytlar kabul edilip başlandy

Gazagystanyň paýtagty Astana şäherinde halkara derejesindäki iri ekologiýa çäresi geçiriler. 2026-njy ýylyň 22–24-nji apreli aralygynda geçiriljek “RES 2026 EXPO” halkara “ýaşyl” tehnologiýalar we durnukly çözgütler sergisiniň çäklerinde sebitiň ekofilm festiwaly guralar. Häzirki wagtda bu medeni-ekologiýa forumyna gatnaşmak üçin sargytlary kabul etmek işine resmi taýdan badalga berildi.

Bu festiwal diňe bir kino bäsleşigi bolman, eýsem medeniýet işgärleriniň, ekologlaryň, halkara bilermenleriň we döwlet pudagynyň wekilleriniň arasynda tejribe alyşmak üçin möhüm gepleşikleriň meýdançasyna öwrüler. Festiwalyň esasy maksady — wizual sungatyň (kino, dokumental film, animasiýa) dili arkaly Merkezi Aziýanyň özboluşly tebigy ekoulgamlaryny görkezmek, häzirki zaman ekologiýa ýagdaýlaryna üns çekmek we jemgyýetde tebigata bolan jogapkärli çemeleşmäni kemala getirmekdir.

Gatnaşmaga Merkezi Aziýa ýurtlaryndan we beýleki sebitlerden režissýorlar, prodýuserler hem-de döredijilik bilen meşgullanýanlar çagyrylýar. Festiwalyň maksatnamasyna aşakdaky ugurlar boýunça dokumental, gysga göwrümli filmler we animasiýalar kabul edilýär: Howanyň üýtgemegi we durnukly ösüş, suw serişdelerinden rejeli peýdalanmak, biodürlüligi gorap saklamak, ESG-transformasiýasy (ekologiýa, durmuş we korporatiw dolandyryş).

Filmleri saýlap almakda olaryň mowzugynyň ähmiýeti, çeperçilik hili, hödürlenişiniň özboluşlylygy we jemgyýet üçin bilim berijiligi ýaly ölçeglere aýratyn üns berler.

Festiwala kino pudagynyň öňdebaryjy halkara we sebit bilermenleriniň, kinoakademiýalaryň wekilleriniň we meşhur prodýuserleriň gatnaşmagyna garaşylýar. Çäräniň geçirilýän ýeri bolan “RES 2026 EXPO” sergisi bolsa, Merkezi Aziýanyň durnukly ösüş ugrundaky iň iri hünär meýdançasy hasaplanýar. Ol 30 ýurtdan 300-den gowrak kompaniýany we 20 000-e golaý hünärmeni bir ýere jemläp, ekologiýa pudagyndaky iň täze çözgütler hödürlener.

Ekologiýa we durnukly ösüş baradaky maglumatlaryň ýaýradylmagynda möhüm orun tutýan bu festiwal, sebitde ýaşyl başlangyçlaryň goldanylmagyna täze itergi berer.

Sargytlar şu salgy arkaly kabul edilýär: ecofilmfest@res2026expo.kz