🦅 Ýaponiýada seýrek duş gelýän kekeçli ibisler ýabany tebigata goýberildi

Ýaponiýada onlarça ýyldan bäri ýabany tebigatda ýitip giden hasaplanýan seýrek duş gelýän kekeçli ibis guşlarynyň sekizisi Hakui şäherinde gaýtadan öz tebigy gurşawyna goýberildi. Bu künjek ozal şeýle ibisleriň iň soňky gezek erkinlikde synlanan mekany hökmünde hasaba alnypdy.

Tebigatyň goýnuna goýberilen bu guşlar Sado adasyndaky ýöriteleşdirilen merkezde ylmy esasda köpeldilip ýetişdirildi. Ýerli häkimiýetler biodürlüligi dikeltmek boýunça maksatnamanyň dowam etdiriljekdigini we ýakyn wagtda ýene-de onlarça guşy ýabany tebigata goýbermegi meýilleşdirýändiklerini mälim edýärler.

Ekologlaryň maglumatlaryna görä, kekeçli ibisler çensiz awçylyk we ýaşaýyş gurşawynyň ýitmegi sebäpli 1970-nji ýyllarda Honsýu adasynda doly ýok bolup, ýerli populýasiýanyň iň soňky wekili 2003-nji ýylda heläk bolupdy. Bu seýrek görnüşi gaýtadan dikeltmek halkara hyzmatdaşlygyň, aýratyn-da, Hytaýyň goldaw bermegi esasynda başartdy. Häzirki wagtda Ýaponiýadaky ibisleriň sany takmynan 500-e ýetdi.