Kongo tokaýlyklarynda maýmynyň täze görnüşi tapyldy

Kongo Demokratik Respublikasynda alymlar maýmynlaryň Colobus congoensis (ýerli ady «likweli») diýlip atlandyrylan täze görnüşini hasaba aldylar. Bu soňky 75 ýylda Afrikada üsti açylan bäşinji täze primat görnüşidir.

Ilkinji gezek 2006-njy ýylda Lomami milli seýilgähinde surata düşürilen bu seýrek jandaryň 2018-nji ýylda gaýtadan görünmegi, ony ylmy taýdan düýpli öwrenmäge ýol açdy. Barlaglar olaryň gara kolobuslar bilen garyndaşdygyny görkezdi.

Likweli maýmynlary diňe Lomami we Lilo derýalarynyň arasyndaky 1,7 müň inedördül kilometrlik çäklendirilen meýdanda ýaşaýarlar. Şol sebäpli alymlar bu seýrek görnüşi bütinleý ýitip gitmek howpundan goramak üçin ony Tebigaty goramagyň halkara birleşiginiň (IUCN) Gyzyl kitabyna girizmegi maslahat berýärler.